Trì buill ùra gan sireadh le bòrd-stiùiridh Iomairt na Gàidhealtachd ’s nan Eilean

Tha Ministearan na h-Alba a’ coimhead ri trì dreuchdan stiùirichean neo-ghnìomha a lìonadh air bòrd Iomairt na Gàidhealtachd ’s nan Eilean (HIE), a’ sùileachadh gum bi na buill ùra a’ tòiseachadh teirm de thrì bliadhna san t-Sultain.

Tha am buidheann leasachaidh ag obrachadh tarsainn roinn a tha gu cruinn-eòlasach eadar-mheasgte, a tha na dachaigh do mu 470,000 neach agus a’ còmhdach còrr air leth de mheall-fearainn na h-Alba, a’ gabhail a-steach 94 eileanan le sluagh.

Le timcheall air 250 cosnaiche, tha HIE a’ cur taic ri gnothachasan agus coimhearsnachdan gus roinn nas uaine, nas cothromaiche, agus nas seasmhaiche a thogail, a tha na buannachd do na h-uile agus a’ cur tabhartas làidir ri eaconamaidh na h-Alba.

Tha an ro-innleachd làithreach còig-bliadhna co-thaobhaichte le poileasaidhean nàiseanta agus a’ mìneachadh lèirsinn airson roinn de neoini lom a’ stiùireadh, le eaconamaidh sunnd a tha fiùghantach.  

Thuirt Aonghas Caimbeul, Cathraiche HIE: “’S e cothrom mìorbhaileach a tha seo do bhuill a thighinn air bòrd-stiùiridh buidhinn àrd-amasail aig a bheil dleastanas deatamach ann a bhith a’ cur taic ri gnothachasan agus coimhearsnachdsan air feadh na Gàidhealtachd ’s nan Eilean.

“Ged a tha na h-amannan seo dùbhlanach do dh’eaconamaidhean air feadh an t-saoghail, tha sinn a’ tuigsinn nan cothroman air leth a tha rim faotainn an seo mar stiùirichean air fàs, soirbheachadh, agus obair chothromach don Ghàidhealtachd ’s na h-Eileanan agus do dh’Alba.

“Gu làithreach, tha iad sin a’ gabhail a-steach comas àibheiseach lùtha ath-nuadhachail, an eaconamaidh ghorm, fànas, saidheansan beatha agus calpa nàdarra na roinne, còmhla ri earrannan fad-stèidhichte leithid turasachd, gnìomhachasan cruthachail, agus biadh is deoch.

“Tha e cudromach gum bi am bòrd againn a’ gabhail a-steach raon de sgilean, fiosrachadh, agus eòlas gus iomadachd ar roinne a nochdadh agus na cothroman is dùbhlain leis a bheil am pàirt seo de dh’Alba a’ cothachadh gu làithreach.”

Tha am bòrd 12-buill aig HIE cunntachail airson stiùireadh ro-innleachdail a shuidheachadh,  prìomh cho-dhùnaidhean a ruighinn, agus riaghladh èifeachdach, le buill aig a bheil raon de sgilean, fiosrachadh, agus eòlas, a tha a’ nochdadh iomadachd na roinne agus leud raon-dleastanais HIE.

Bithear a’ sùileachadh do thagraichean uile sa chuairt trusaidh seo gum bi cleamhnas dlùth aca ris a’ Ghàidhealtachd ’s na h-Eileanan, agus mothachadh làidir do na cothroman agus na dùbhlain ris a bheil gnothachasan agus coimhearsnachdan tarsainn na roinne a’ dèiligeadh.

Bu chòir dhaibh cuideachd fiosrachadh agus eòlas air co-dhiù aon de thrì phrìomh earrannan a thaisbeanadh – is iad sin biadh is deoch, turasachd, agus lùth gu h-àraid far-thìre.

Bidh fiosrachadh agus eòlas air cànan is cultar na Gàidhlig agus air togail beairteas coimhearsnachd nam buannachd.

Tha Ministearan na h-Alba a’ cur fàilte gu h-àraid air tagraidhean bho bhoireannaich, daoine le ciorram, daoine LGBTQI+, daoine à coimhearsnachdan mhion-shluagh cinnidheach, agus daoine fo aois 50. Bidh sgeama agallaimh barantaichte do thagraichean ciorramach an làthair.

Tha làn-fhiosrachadh ri fhaotainn air làrach-lìn Public Appointments Scotland.